TNT - Teen News Thunder

Целта на списанието TNT е создавање на еден иновативен младински орган за информирање и забава. Преку тинејџерското списание на малдите во Неготино, па понатаму и пошироко ќе им овозможиме една алтернатива за информирање, забава, а истовремено и ќе го поттикнеме интересот на младиот човек околу различни теми. Ова списание е едно интересно четиво кое го создаваме со цел да ги едуцираме, а воедно и ментално да ги раздвижиме младите низ градов.

Идејата за формирање на TNT (Teen News Thunder ) ја имаа координаторите на тимот, Тоде Пашлаков и Austin Fast кои не собраа нам, младите креативци, на информативна средба од која што сè започна. Идејата ја негувавме како единствен цвет во градината, а од таа идеја се изродија и уште безброј идеи за да допреме конечно до овој степе, објавување на првиот број на TNT. Малдиот човек е во постојана потрага по забава, едукација и иновативност. А ние сето ова го сплотивме во една целина и ја нарековме TNT, новото списание за млади.

За една новинарска дејност да егзистира и да дава продукти неопходни се одредени финансиски подршки на самиот старт. Овде рака ни подадоа ГЦПР (граѓански центар за превентива и ресоцијализација), Friends of Macedonia, поранешна група на мировни сили која сè уште сака да биде приклучена кон државата преку донирање пари за проекти.

Младинците кои се вклучени во овој проект пред сè се креативни, иновативни и исклучиво талентирани ученици, што значи дека воедно тоа се и главните карактеристики кои треба да ги поседува една млада личност за да биде член на новинарскиот клуб TNT – Неготино. Но се разбира дека ние воопшто не поставуваме некакви правила кои ќе пресудат кој може, акој не може да ни се приклучи. Секој млад човек кој мисли дека би се снашол на некаков начин во оваа аматерска новинарска работа, или едноставно мисли дека има способности за фотографирање, снимање, репортирање, пишување на статии, колумни, рецензии може слободно да ни се придружи.

Кога ќе ја свртите оваа страница можете да очекувате една огромна разноликост од стилови и теми со кои се опфатени рубриките во TNT. Од музика и филм, до литература, ликовна уметност, предлози за полесно снаоѓање со училишните задачи, мода, интервјуа и репортажи за разни настани од сите области.

Членовите на Новинарскиов клуб присуствуваат и на разни обуки кои обично ги организираат координаторите, Austin Fast и Тоде Пашлаков, со една единствена цел кон која секој нареден миг се доближуваат сè повеќе и повеќе – стекнување на одредено искуство од областа на новинарството и произведување на квалитетни идни новинари како и развивање на до сега стекнатото знаење и способности.

Со љубов,

Од тимот